|
Hendrina se vroue neem voortou!
In Oktober 1999 het
die vroue van Hendrina die Emily Hobhouse Dienskorps met mev Natalie
Botha as voorsitter gestig. Die eerste herdenkingsfunksie wat op 20
Oktober 1999 gereël is, was 'n groot byeenkoms waarby die film van
Emily Hobhouse vertoon is met inligting oor die rol van die vrou in
die Tweede Vryheidsoorlog.
Die Vrouekomitee het Hendrina se dames geluk gewens
met dié pragtige aksie.!!!
Ander dorpe waar vroue reeds aktief is, is onder meer
Bloemfontein, Potchefstroom, Belfast, Dullstroom, Kroonstad en
Pretoria. Op baie ander dorpe is die vroue ook aan die gang.
Die Vrouekomitee van die Volkskomitee, wat met die
herdenking van die vrou in die oorlog te doen het, beveel aan dat
vroue-dorpskomitees van al die dorpe in ons land, ook waar nie
konsentrasiekampe was nie, deur middel van komitees of dienskorpse
herdenkingsgeleenthede in hulle dorpe reël.
Die mees opwindende is om u dienskorps/komitee te
noem na 'n vrou wat in die Tweede Vryheidsoorlog 'n besondere rol
gespeel het, soos tant Alie Badenhorst wat in die Klerksdorp
omgewing gewoon het, of Johanna Brandt van Pretoria wat in die
Irene-kamp verpleeg het en wat vir die Boere so 'n waardevolle
spioen was, mev Tibbie Steyn van Bloemfontein, ensovoorts.
U sal nou vra wat verstaan word met 'n "besondere"
rol? Elke vrou wat dwarsdeur die oorlog ellende en vernedering
ondergaan het, maar bly sê het dat haar man vir vryheid en vir reg
moet aanhou veg, was 'n heldin en het 'n besondere rol gespeel! U
kan selfs ook die naam van 'n kind of jong meisie neem.
Wat 'n uitdaging vir die vroue om dwarsdeur die land
te begin met navorsing! Toe die vroue van Hendrina van hierdie
aanbeveling hoor, was hulle die ene opgewondenheid om die naam te
verander na die Hendrina Joubert Dienskorps en om inligting te begin
soek oor die van genl Piet Joubert.
Ons is oortuig daarvan dat uit hierdie navorsing baie
besondere inligting bekend sal word. |
